გლობალური კატასტროფები

სიახლეები

ყოფნა არყოფნის ზღვარზე

NOTA BENE

ადამიანი და გარემო

სადიაგნოსტიკო მეთოდები

მიმოხილვა

თარგმანი

ახალი მეთოდები

კლინიკური კვლევა

CASE REPORT

ლიტერატურული გვერდი


ძებნისთვის ჩაწერეთ
4 ან მეტი სიმბოლო



ჭიპის და პარაუმბილიკალური თიაქრების პლასტიკა პირამიდული საცობის გამოყენებით [5.00]

რობოტები და ქირურგია – სამეცნიერო ფანტასტიკა და რეალობა [5.00]

აპოკალიფსის 25 წელი [0.00]

სიამის ტყუპები [0.00]

კოტარდის სინდრომი [0.00]


ჭიპის და პარაუმბილიკალური თიაქრების პლასტიკა პირამიდული საცობის გამოყენებით [8344]

ღვიძლის დაავადებათა დიაგნოსტიკის ჰისტოპათოლოგიური მეთოდები [8306]

სიამის ტყუპები [7700]

22 წელი ჩერნობილის კატასტროფიდან… [5510]

კოტარდის სინდრომი [5498]


თემების რაოდენობა: 16
კომენტარები: 0

რობოტები და ქირურგია – სამეცნიერო ფანტასტიკა და რეალობა

ავტორი: ნ. გაფრინდაშვილი, დ. ჯიქია
თბილისის სახელმწიფო სამედიცინო უნივერსიტეტი

>>  „კეთილი იყოს თქვენი მობრძანება ქირურგიის განვითარების მომდევნო საფეხურზე, ეს ახალი თაობაა...“ – ეს მინი რობოტების შემქმნელთა სიტყვებია. მათ ხმამაღალი სიტყვა თქვეს ქირურგიის ისტორიაში და პირველი ნაბიჯებიც გადადგეს. ერთი შეხედვით უსიცოცხლო, უსახურ რკინის კონსტრუქციებს სული შთაბერეს და სასწაულების მოხდენა დაიწყეს ქირურგიის ნებისმიერ მიმართულებაში: კარდიოლოგია, გულმკერდის ქირურგია, გინეკოლოგია, აბდომინური ქირურგია, უროლოგია და სხვ. თუმცა უმჯობესია ნაბიჯ-ნაბიჯ მივყვეთ...
ყველაფერი კი ასე დაიწყო...


დასაბამი
1985 წელი – პირველი ცდა. თავის ტვინის საბიოფსიო ნემსის შესაყვანად მეცნიერებმა რობოტი PUMA 560 გამოიყენეს. მონიტორინგი კომპიუტერული ტომოგრაფით განხორციელდა.
რობოტული ქირურგიული ტექნიკის განვითარებაში ძალიან მნიშვნელოვანი როლი მაღალტექნოლოგიური სამედიცინო მოწყობილობების კომპიუტერულმა კომპანიამ Computer Motion-მა ითამაშა. კომპანია 1989 წელს დაარსდა. მისი მიზანი სრულყოფილი რევოლუციური სამედიცინო ტექნიკის შექმნა და პაციენტების კეთილდღეობა გახდა. მათ ეს ნამდვილად გამოუვიდათ. შეიქმნა უამრავი ქირურგიული ხელსაწყო და „ჭკვიანი“ საოპერაციო.
Computer Motion-ის პირველი პროდუქტი სისტემა „ეზოპე“ იყო. ის მცირეინვაზიური ლაპაროსკოპული ოპერაციების დროს ლაპაროსკოპის კამერის დამჭერად გამოიყენებოდა და მას „ქირურგის მესამე ხელი“ უწოდეს.
1988 წელს პროსტატექტომიისათვის გამოიყენეს PROBOT-ი.
1992 წელს ROBODOC-მა ინტეგრაციულ ქირურგიულ სისტემებში წარმოადგინა რობოტი, რომლის საშუალებითაც ხდებოდა კიდურთა ამოვარდნილობების ჩასწორება.
რობოტული სისტემების განვითარების მომდევნო ეტაპი „და ვინჩის“, „ეზოპესა“ და „ზევსის“ ქირურგიული სისტმების შექმნა იყო.
1993 წლის დეკემბერში შეიქმნა „ეზოპე 1000“, რომელსაც აშშ-ს პროდუქტებისა და სამკურნალწამლო საშუალებების ადმინისტრაციამ (Food and Drug Administration – FDA) მიანიჭა ლიცენზია. 1996 წელს „ეზოპე 2000“-ს დაემატა ხმის კონტროლის სისტემა, ხოლო 1998 წელს „ეზოპე 3000“-ის მანიპულატორებმა მართვისას მოძრაობის მეტი თავისუფლება შეიძინეს.
1997 წელს კლივლენდში „ზევსის“ სისტემის საშუალებით წარმატებით განხორციელდა ფალოპიუსის მილების გამავლობის აღდგენა.
1998 წლის მაისში ექიმმა ფრიდრიხ-ვილჰელმ მორმა პირველად გამოიყენა „და ვინჩის“ ქირურგიული რობოტი გულზე ოპერაციისას (ლაიფციგის გულის ცენტრი, გერმანია).
2001 წელს პროფესორმა მარესკომ საფრანგეთში, სტრასბურგში „ზევსის“ რობოტების საშუალებით შეასრულა ქოლეცისტექტომია ღორზე.
რობოტი-ქირურგი?!
მაგრამ... ქირურგ-რობოტებსა და რობოტებით წარმოებულ ქირურგიულ ოპერაციებზე საუბრისას ყოველთვის მომავლისაკენ ვიყურებით, სინამდვილეში კი ეს ფაქტი უკვე აწმყოა და რობოტებმა უკვე დაიკავეს ადგილი საოპერაციოებში, იმ უნარებისა და თვისებების წყალობით, რომლებითაც ისინი ადამიანთა შესაძლებლობებს უახლოვდებიან და ზოგჯერ აღემატებიან.
რობოტებით წარმოებული ქირურგიული ოპერაციებისას გამოყენებული ტექნიკა თავის თავში აერთიანებს რობოტული ინჟინერიისა და კომპიუტერული ტექნოლოგიების უახლეს მიღწევებს. მათი მედიცინაში დანერგვა შემთხვევითი მოვლენა არ არის; ყველაფერი აუცილებლობამ განაპირობა. თანამედროვე სამედიცინო მიდგომის მკაცრი მოთხოვნაა ქირურგიული ინსტრუმენტების ზუსტი და შედარებით უშეცდომო მართვის სისტემა, ნაკლები გართულებები და დანახარჯები, რისკისა და ინვაზიურობის ხარისხის შემცირება.
რობოტული სისტემების უპირატესობები:
• ქირურგიული მანიპულაციების მეტი სიზუსტე მინიმალურად ინვაზიური მეთოდებით;
• საერთო ჯამში ოპერაციის ინვაზიურობის მინიმუმამდე დაყვანა;
• ავადმყოფის თვითშეგრძნების გაუმჯობესება;
• სწრაფი განკურნება.
რობოტი-ქირურგების პირველმა თაობებმა წარმატებით დაიპყრეს მსოფლიოს უამრავი საოპერაციო; ერთი წლის განმავლობაში შესრულებულია სხვადასხვა სირთულის 3,5 მილიონზე მეტი სამედიცინო პროცედურა და მანიპულაცია და ესეც მხოლოდ აშშ მონაცემებით. აღსანიშნავია, რომ არცერთი მათგანი არ წარმოადგენს სრული ავტონომიის მქონე ხელსაწყოს, რომელსაც 100%-ით დამოუკიდებლად შეუძლია დაგეგმოს და მართოს ოპერაციის მიმდინარეობა. ნებისმიერი მათგანი საჭიროებს ოპერატორ ქირურგს – ადამიანს, რომლის ინსტრუქციებიც აუცილებელია.
„და ვინჩის“ სისტემა (სურათი 1)
2000 წლის 11 ივლისს აშშ-ს პროდუქტებისა და სამკურნალწამლო საშუალებების ადმინისტრაციამ (FDA) მოიწონა „და ვინჩის“ სისტემა და დაუშვა მისი გამოყენება ამერიკის საოპერაციოებში. მისი ღირებულება დღესდღეობით 1,2 მილიონ აშშ დოლარს შეადგენს.
„და ვინჩის“ სისტემა ქირურგებს შორის ყველაზე დიდი პოპულარობითა და ნდობით სარგებლობს.
იგი სამი ძირითადი კომპონენტისგან შედგება (სურათი 2): ქირურგის კონსოლი, პაციენტის გვერდით განთავსებული რობოტის მანიპულატორი ორი „ხელით“, რომელიც იმართება ქირურგის მიერ, ინსტრუმენტები, რომლებიც თავსდება ავადმყოფის ორგანიზმში და ვიდეო კამერასა და ხმის კონტროლის მქონე მესამე „ხელთან“ დაკავშირებული სამგანზომილებიანი ვიზუალიზაციის სისტემა (სურათი 3).
რობოტის „ხელებთან“ დაკავშირებულია მოქნილი ქირურგიული ინსტრუმენტები; ისინი სპეციალური კანულებით შეჰყავთ ორგანიზმში. ასეთი აპარატურით წარმოებული ოპერაციების დროს ნატიფი მოძრაობების შესრულებისას ხდება ქირურგის ხელების კანკალის თავიდან აცილება (სურათი 4).
„და ვინჩის“ სისტემა ამერიკისა და ევროპის რვაასზე მეტ კლინიკაში გამოიყენეს სხვადასხვა ქირურგიული ოპერაციისას: პროსტატექტომია პროსტატის კიბოს გამო, ჰისტერექტომია, მიტრალური სარქვლის პროთეზირება. 2006 წელს „და ვინჩის“ სისტემამ 48 000 პროცედურაში მიიღო მონაწილეობა.
როჩესტერის უნივერსიტეტის სამედიცინო ცენტრის მემორიალური კლინიკის ქირურგები იყვნენ პირველები, რომელთაც ლაპაროსკოპული ოპერაციის დროს რობოტული ტექნოლოგიები გამოიყენეს.
რობოტული ტექნოლოგიების შემქმნელებმა პირველი პროდუქტის სახელი დიდი ლეონარდოს სახელს დაუკავშირეს. „და ვინჩის“ რობოტული სისტემით ქირურგიული ოპერაცია საოცრად ხარისხიანი და მაღალტექნოლოგიურია და იგი უმაღლეს ხელოვნებასთანაა გაიგივებული. „და ვინჩის“ ქირურგიული რობოტების სისტემა ოპერაციის მაქსიმალური სიზუსტითა და აკურატულობით წარმოების საშუალებას იძლევა.
სისტემის მახასიათებლებია:
• 3D ხედვა;
• სამი „ხელი“;
• დაუღალავი ხელები;
• თითები, რომლებიც არ ცახცახებს;
• გაზრდილი სიმარჯვე და მოქნილობა.
როგორ მუშაობენ რობოტები?
რობოტის გამოყენებით ქირურგიული ოპერაციის ჩასატარებლად არა მარტო რობოტის, გამოცდილი ქირურგების არსებობაცაა აუცილებელი. მთავარი ოპერატორი-ქირურგი ადგილს ქირურგის კონსოლთან, პაციენტისგან რამდენიმე მეტრის მოცილებით იკავებს. ის თავლყურს ადევნებს ვიზუალიზაციის სისტემას, რომელიც საოპერაციო ველის გადიდებულ, სამგანზომილებიან გამოსახულებას იძლევა. პარალელურად იგი მანიპულირება კონსოლში დამაგრებული სახელურებით და მოძრაობაში მოჰყავს პაციენტის ორგანიზმში განთავსებული ქირურგიული ინსტრუმენტები. ასეთი ტიპის ოპერაცია ქირურგს ნატიფი და ზუსტი მოძრაობების შესრულების საშუალებას აძლევს ხელის დაღლის გარეშე.
რობოტული სისტემა თავის მხრივ, გარდაქმნის და გადასცემს ხელის თითოეულ მოძრაობას იმ უმცირეს ინსტრუმენტებს, რომლებიც პაციენტის ორგანიზმში რამდენიმე მილიმეტრი ზომის განაკვეთიდან მოხვდნენ.
ამგვარად გაზრდილი ხედვისა და სიმარჯვის წყალობით დღეს უკვე შესაძლებელია ბოლო მოეღოს ზოგიერთი ინვაზიური ტიპის ოპერაციის ჩატარების შეზღუდვას და მაქსიმალურად ჩავრთოთ ოპერირებისას ლაპაროსკოპული ინსტრუმენტები.
სისტემის მიმოხილვა
ოპერაციის დროს კეთდება ერთი ან რამდენიმე ერთსანტიმეტრიანი განაკვეთი, რაც ინვაზიისა და ინფიცირების რისკს მინიმუმამდე ამცირებს. ჩვეულებრივ, მუცლის ღრუში შეჰყავთ ნახშირბადის მონოოქსიდი უფრო მეტი სივრცისა და მოძრაობის თავისუფლების უწრუნველსაყოფად. ინტუიციური ქირურგიის ასოციაციის ვიცე პრეზიდენტის ბენ გონგის აზრით „და ვინჩის“ სისტემა ინფექციის ინტრაოპერაციულად განვითარების რისკს 2-3%-დან 0-მდე ამცირებს. როგორც აღვნიშნეთ „და ვინჩის“ სისტემა ოთხი მთავარი კომპონენტისაგან შედგება: ქირურგის კონსოლი, პაციენტის გვერდით განთავსებული რობოტის მანიპულატორი ორი „ხელით“, რომელიც იმართება ქირურგის მიერ, ინსტრუმენტები, რომელიც თავსდება ავადმყოფის ორგანიზმში და ვიდეო კამერასა და ხმის კონტროლის მქონე მესამე „ხელთან“ დაკავშირებული სამგანზომილებიანი ხედვის სისტემა.
მოკლედ მიმოვიხილოთ თითოეული მათგანი:
ქირურგის კონსოლი
ქირურგის კონსოლი ესაა 1-2 მ2 ფართობზე განთავსებადი მოწყობილობა, რომელიც საოპერაციო მაგიდიდან შედარებით შორს თავსდება. ქირურგი თვალყურს ადევნებს პროცესის რეალურ მიმდინარეობის სამგანზომილებიან გამოსახულებას ეკრანზე, თავად აწარმოებს ყოველგვარ მანიპულაციას სახელურების მეშვეობით. ეს კი, თავიდან გვაცილებს ხელებისა და მაჯების კანკალსა და დაღლას. სახელურზე ხელის ყველა მოძრაობა ელექტრონული იმპულსით გადაეცემა ერთ-ერთ მანიპულატორს და იგი ხელის სინქრონულად მოძრაობს.
მანიპულატორი „ხელები“ (სურათი 5).

სისტემის ეს კომპონენტი მოიცავს რობოტის „ხელებს“, რომელიც უშუალო კონტაქტშია პაციენტთან და რომელსაც ემაგრება ქირურგიული ინსტრუმენტები. სისტემას აქვს სამი მანიპულატორი და ერთი ენდოსკოპური „ხელი“. მას შეუძლია ყველანაირი მანიპულაციის ჩატარება და თითქმის არ გააჩნია შეზღუდვები. ოპერატორი ქირურგი ვერ ხედავს უშუალოდ ამ ინსტრუმენტებს და ის მთლიანადაა მინდობილი ეკრანს. 2003 წელს დააპატენტეს მეოთხე „ხელი“, როგორც დამატებითი ინსტრუმენტი, რომლის ღირებულება 175 000 აშშ დოლარს შეადგენს.
სამაგრი ხელსაწყოები
სამაგრი ხელსაწყოები მანიპულატორებს უმაგრდება და ქირურგს ნებისმიერი ტიპის მანევრის განხორციელების საშუალებას აძლევს. ყველა ინსტრუმენტს თავისი განსაზღვრული ფუნქცია აქვს, დაწყებული ნაკერების დადებიდან, მომჭერების დადებით დამთავრებული. მანევრირების ხარისხი საკმაოდ მაღალია, სწრაფად ხდება ერთი ინსტრუმენტის მეორეთი შეცვლა. მოწყობილობა იმახსოვრებს რობოტული „ხელის“ პოზიციას ერთი ინსტრუმენტის მოხსნიდან, მეორეს მიმაგრებამდე, აქედან გამომდინარე, მეორე ინსტრუმენტიც ზუსტად იგივე პოზიციაში დგება, როგორშიც პირველი იყო. ინსტრუმენტებს გააჩნიათ საყრდენი წერტილის გარშემო ბრუნვისა და როტაციის უნარი შვიდი მიმართულებით. ამას გარდა, ქირურგს შეუძლია ძალის გამოყენებით აკონტროლოს სხვადასხვა ზომის ნაწილები, უმცირესი ზომით დაწყებული, უდიდესით დამთავრებული.
ასეთი ტიპის ტექნიკას აქვს უნარი, საჭიროების შემთხვევაში დაარეგულიროს და „გაფილტროს“ ხელის კანკალისას წარმოქმნილი ტლანქი მოძრაობები, რის შედეგადაც ქირურგის ხელის მიერ შესრულებული უხეში სამუშაო ტრანსლირდება რობოტული მოწყობილობების ნატიფ, დახვეწილ მოძრაობებად.
სამგანზომილებიანი ხედვის სისტემა (სურათი 6).
სამგანზომილებიანი ხედვის სისტემა დაკავშირებულია ვიდეო კამერასა და ხმის კონტროლის მქონე მესამე „ხელთან“ ან ენდოსკოპთან. ხედვის სისტემას გააჩნია უმაღლესი ხარისხი და იძლევა იმ პროცესის დროში რეალურ გამოსახულებას, რომელიც მიმდინარეობს პაციენტის ორგანიზმში, რადგანაც ხდება ნებისმიერი კადრის ფილტრაცია, რომელიც მოდის ვიდეო პროცესორიდან წამის მეათასედებში. გარდა ამისა, კონსოლს გააჩნია სატერფული, რომელიც იძლევა კადრების სწრაფი ცვლის საშუალებას ერთი მეორის მიყოლებით. ენდოსკოპი დაპროგრამებულია ტემპერატურის ავტომატური რეგულაციის რეჟიმზე, რაც თავიდან გვაცილებს აპარატურის დანისვლას ოპერაციის მსვლელობისას.
რა არის ასეთი გასაოცარი რობოტებით წარმოებულ ქირურგიულ ოპერაციაში?
უპირატესობები და ნაკლოვანი მხარეები
„და ვინჩის“ ქირურგიული რობოტების სისტემის გამოყენება უპირატესობას აძლევს როგორც პაციენტებს, ისე ქირურგებს. დღესდღეობით უმეტეს საოპერაციოებში მუშაობს ორი ან სამი ქირურგი, ანესთეზიოლოგი, რამდენიმე ექთანი. საბოლოო ჯამში მათი რაოდენობა საკმაოდ დიდია. რობოტული ტექნოლოგიის გამოყენება მათ რიცხვს საგრძნობლად ამცირებს და ოპერაციის ჩასატარებლად სრულიად საკმარისია ერთი ქირურგი, ანესთეზიოლოგი და ერთი ან მაქსიმუმ ორი ექთანი. ქირურგის კონსოლი შესაძლებელია მოთავსდეს საოპერაციოს გარეთაც კი, აქედან გამომდინარე, საოპერაციო ოთახი თითქმის ცარიელი რჩება. ამ აპარატურის საშუალებით ოპერაციისას ქირურგი უკეთესად ხედავს, ხელის მოძრაობები უფრო ზუსტი და ნატიფია, პროცესი – მინიმალურად ინვაზიური. კომპიუტერული კონსოლის დანერგვა და აქტიური გამოყენება ხელს უწყობს ტელექირურგიის და ზოგადად ტელემედიცინის განვითარებას, რაც წლების მერე საშუალებას მისცემს ქირურგებს ოპერაციები აწარმოონ ვირტუალურად, პაციენტებისგან ათეულობით და ასეულობით კილომეტრების მოშორებით.
ის ფაქტი, რომ საოპერაციოში ნაკლები იქნება თანამშრომლების რაოდენობა და ქირურგს საშუალება ექნება შორი მანძილიდან აწარმოოს ოპერაცია, შეამცირებს ოპერაციის დანახარჯებს.
უპირატესობები პაციენტისთვის:
• შემცირებული სისხლდენა, სისხლის მცირე დანაკარგი და ტრანსფუზიის ნაკლები საჭიროება;
• ნაკლები ტკივილი და ტრავმა;
• გართულებების ნაკლები რისკი და ნაკლები დისკომფორტი;
• ნაკლებინვაზიურობა;
• ინფექციის განვითარების ნაკლები რისკი;
• ჰოსპიტალიზაციის შემცირებული ვადები;
• უფრო სწრაფი გამოჯანმრთელება.
ადამიანი-ქირურგის და რობოტული ქირურგიული სისტემის შედარება იხ. ცხრილი 1.
„და ვინჩის“ ქირურგიული სისტემა დაახლოებით ორჯერ ამცირებს პაციენტის ჰოსპიტალიზაციის ვადებს, ხოლო ხარჯებს – 33%-ით. თუმცა ოპერაციის ხანგრძლივობა საშუალოდ 40-50 წუთით იზრდება.
რითი განსხვავდება რობოტებით წარმოებული ქირურგიული ოპერაცია მცირეინვაზიური ქირურგიისაგან?
მცირეინვაზიური ანუ ლაპაროსკოპული ქირურგია ძალიან ბევრი ქირურგიული ოპერაციის ალტერნატიულ გზად იქცა და ის ტრავმულობისა და ჭრილობების რიცხვის შემცირების საშუალებას გვაძლევს. ზოგიერთი ოპერაციის შემთხვევაში კი მან პირველ პოზიციაზე გადაინაცვლა, თუმცა დღემდე არ იყო ლაპაროსკოპული ქირურგიის რთული და კომპლექსური ოპერაციების დროს გამოყენების შესაძლებლობა (ცხრილი 2).
ამჟამად კი გამოცდილი ქირურგების და „და ვინჩის“ ქირურგიული სისტემის წყალობით შესაძლებელია მინიმალურად ინვაზიური ტექნიკის გამოყენება ყველაზე რთული ოპერაციების საწარმოებლად.
სხვა სისტემები
„ზევსის“ სისტემა (სურათი 7)
ეს არის მეორე რობოტული სისტემა, რომელსაც FDA-ს ლიცენზია მიენიჭა. მისი პირველი პროტოტიპი 1995 წელს შეიქმნა, 1996 წელს მან გაიარა ტესტირება ცხოველებზე. მასზე მაგრდება 28 სხვადასხვა ისნტრუმენტი სკალპელების, კვანძის გასაკეთებელი კავების, მაკრატლებისა და სასექციო დანების ჩათვლით. როგორც „და ვინჩის“, ისევე „ზევსის“ სისტემა სარგებლობს მოწონებითა და მხარდაჭერით ევროპისა და ამერიკის უამრავი ქვეყნის ჯანდაცვის სამინისტროების მხრიდან. „ზევსის“ დანადგარის ღირებულება 750 000 აშშ დოლარს შეადგენს.
ძირითადი აღჭურვილობებით იგი ახლოსაა „და ვინჩის“ სისტემასთან; მასაც აქვს კომპიუტერული მართვის პულტი, ვიდეო-დისპლეი, ქირურგის სამართავი სახელურები და კონსოლი. „ზევსის“ სისტემა დღეს უფრო მიღებული და დანერგილია გერმანიაში.
„ეზოპეს“ სისტემა (სურათი 8)
ეს სისტემა პირველი იყო, რომლის გამოყენების ნებაც 1994 წელს FDA-მ მისცა ამერიკელ ქირურგებს. ის ქირურგის ასისტენტის როლს ასრულებდა. კონსტრუქციულად „ეზოპე“ ბევრად მარტივი მოწყობილობაა, ვიდრე „და ვინჩისა“ და „ზევსის“ სისტემები. მას მხოლოდ ერთი მექანიკური „ხელი“, ხმის სისტემა და სატერფულები გააჩნია.
რობოტული სისტემების მარკეტინგული ინფორმაცია და ღირებულებები
თავდაპირველად კომპანიებს, რომლებიც რობოტულ ტექნოლოგიებს აპატენტებდნენ, საკმაოდ დიდი პრობლემები ჰქონდათ წამყვან კომპიუტერულ ფირმებთან და მათი გაყიდვებიც არ იყო შესამჩნევად დიდი, თუმცა 2004 წელს საერთო შემოსავალმა 138.8 მილიონ აშშ დოლლარს მიაღწია და წინა წელთან შედარებით 51%-ით გაზარდა მოგება (60 მილიონი აშშ დოლარი). შემოსავლის ძირითად წყაროს შეადგენს ინსტრუმენტები, აქსესუარები, მოწყობილობები, სერვისი, რომელიც გაიზარდა იმ მარტივი მიზეზის გამო, რომ უამრავ საავადმყოფოში მოხდა აპარატურის დამონტაჟება. 2004 წელს „და ვინჩის“ 76 სისტემა გაიყიდა. თითოეული მათგანის ღირებულება 1-1.5 მილიონი აშშ დოლარია (ცხრილი 3).
დაცვის მექანიზმები
რობოტულ ტექნოლოგიას გააჩნია დამცავი სისტემები, რაც თავიდან აგვაშორებს ოპერაციის მიმდინარეობისას სხვადასხვა გაუთვალისწინებელ შემთხვევას. პროცედურის დაწყებისას ქირურგის თავი მოთავსებული უნდა იყოს კონსოლის იმ ნაწილში, საიდანაც ხდება ოპერაციის მსვლელობის კონტროლი, წინააღმდეგ შემთხვევაში ხდება პროცესის ავტომატური ბლოკირება. კვების წყარო, რომლითაც აღჭურვილია სისტემა, ოცი წუთის განმავლობაში არ საჭიროებს დატენვას. თითოეულ ინსტრუმენტს აქვს მინი ჩიპი, რომელიც ინახავს ინფორმაციას ამ ინსტრუმენტის შესახებ.
მიუხედავად ბევრი უპირატესობისა, რობოტულ სისტემას აქვს სხვადასხვა ნაკლი: მაღალი ფასი, დიდი ზომა, ნაკლები ტაქტილური მგრძნობელობა და ა.შ., რომლის დაძლევაზეც მუშაობს მრავალი კომპიუტერული ფირმა. ამდენად, ჩვენ ჯერ კიდევ შორს ვართ ისეთი ავტონომიური რობოტების შექმნისაგან, რომლებიც ადამიანებისგან დამოუკიდებლად ჩაატარებენ ქირურგიულ მანიპულაციებს.

სურათი 9. „და ვინჩით“ აღჭურვილი საოპერაციო

- - - - - - - - - - - - - - - - - - - -

1989 წელს დაარსდა მაღალტექნოლოგიური სამედიცინო მოწყობილობების კომპიუტერული კომპანია „Computer Motion“ და მისი მიზანი სრულყოფილი რევოლუციური სამედიცინო ტექნიკის შექმნა და პაციენტების კეთილდღეობა გახდა.
1992 წელს ოსტეოართრიტით დაავადებულ 64 წლის პაციანტს რობოტული სისტემის საშუალებით ჩაუტარდა ბარძაყის ძვლის პლასტიკა.
1993 წლის დეკემბერში „ეზოპე 1000“ გამოიყენეს ენდოსკოპური კამერის დამჭერად.
1997 წელს ჟაკ ჰიმპენსმა და გაი კარდიერმა პირველებმა გამოიყენეს „და ვინჩის“ სისტემა ნაღვლის ბუშტზე ოპერაციისას (ბელგია, ბრიუსელი).
1998 წლის მაისში „და ვინჩის“ სისტემის საშუალებით პირველად გაკეთდა მიტრალური სარქვლის პროთეზირება.
1998 წელს ამერიკელმა ექიმმა ფრანკ დიამინომ „ზევსის“ სისტემით პირველმა გააკეთა ფალოპიუსის მილების რეანასტომოზირების ოპერაცია.
2000 წლის 13 მარტს ფრანსუა ლაბორდმა „ზევსის“ რობოტული სისტემის დახმარებით პედიატრიაში პირველმა აწარმოვა ოპერაცია გულზე.
2005 წლის აპრილში ჩიკაგოში ილინოისის სამედიცინო ცენტრის საუნივერსიტეტო კლინიკაში წარმატებით ჩატარდა ლაპაროსკოპული ჰეპატექტომია, სადაც მოხდა სიმსივნით დაავადებული ღვიძლის 60%-ის ამოკვეთა.

წყაროები RESOURCES:
www.mizuho.co.jp
www.accuray.com
www.smallcapreview.com
www.intersurgtech.com
www.jointsurgeons.com
www.dailynexus.com
www.intuitivesurgical.com
www.targethealth.com
www.vehand.engr.ucf.edu
www.robodoc.com
www.lejacq.com
www.oha.com
www.biomed.brown.edu
www.intuitivesurgical.com
www.trueforce.com
www.accuray.com
www.nationalgeographic.com
www.accuray.com
www.trueforce.com
www.fda.gov
www.medicalnewstoday.com

ლიტერატურა

ნანახია: 4033 | შეფასებულია: 1 | რეიტინგი: [5.00]  



შეფასება

შესაფასებლად გაიარეთ ავტორიზაცია, ან დარეგისტრირდით


კომენტარები

კომენტარის დასამატებლად გაიარეთ ავტორიზაცია, ან დარეგისტრირდით



სახელი

პაროლი


2010 | მაისი–ივნისი | 16

2010 | მარტი–აპრილი | 15

2010 | იანვარი–თებერვალი | 14

2009 | ნოემბერი–დეკემბერი | 13

2009 | სექტემბერი–ოქტომბერი | 12

2009 | ივლისი–აგვისტო | 11

2009 | მაისი–ივნისი | 10

2009 | მარტი–აპრილი | 9

2009 | იანვარი–თებერვალი | 8

2008 | ნოემბერი–დეკემბერი | 7

2008 | სექტემბერი–ოქტომბერი | 6

2008 | ივლისი–აგვისტო | 5

2008 | მაისი–ივნისი | 4

2008 | მარტი–აპრილი | 3

2008 | იანვარი–თებერვალი | 2

2007 | ნოემბერი–დეკემბერი | 1


ჯანდაცვის მსოფლიო ორგანიზაცია

საქართველოს შრომის, ჯანმრთელობის და სოციალური დაცვის სამინისტრო

თბილისის სახელმწიფო სამედიცინო უნივერსიტეტი

ქართული google


დარეგისტრირებულია: 531

ამჟამად საიტზეა: 8

თქვენ ხართ სტუმარი No: 1268404


საიტის ავტორი: კობა კურტანიძე
© Copyright 2009-2017 MODERNPUBLISHING.GE
საიტზე არსებული მასალის გამოყენება ან გავრცელება, საიტის ადმინისტრაციის ნებართვის გარეშე, აკრძალულია.