სამედიცინო მენეჯმენტი

მიმოხილვა

გაიდლაინი

კვლევა

CASE REPORT

სიახლეები

თარგმანი

ჩვენი თანამედროვე

ლიტერატურული გვერდი


ძებნისთვის ჩაწერეთ
4 ან მეტი სიმბოლო



სამედიცინო დაწესებულების მართვის ისტორიული ასპექტები [5.00]

მარათონთან დაკავშირებული სიკვდილის მიზეზი ტვინის ღეროს ჰერნიაციაა, რაც რეჰიდრატაციასთან ასოცირებული ჰიპონატრემიის შედეგია [5.00]

მწვავე რევმატიული ცხელების ეტიოლოგია და იმუნოპათოგენეზი [5.00]

პროფესია – ექიმი, მოწოდება – მკურნალი [5.00]

მძიმე საყოფაცხოვრებო პნევმონიის ­­­­­მკურნალობა მოქსიფლოქსაცინით [5.00]


ფსორიაზისა და ფსორიაზული ართრიტის მართვა ნაწილი I. ფსორიაზი და ბიოლოგიური აგენტებით მისი მკურნალობის გაიდლაინი [9884]

არადემონსტრირებული გიგანტური ცისტადენომის შემთხვევა პუბერტული ასაკის პაციენტში [8769]

მწვავე რევმატიული ცხელების ეტიოლოგია და იმუნოპათოგენეზი [8525]

დერმატოლოგიური მანიფესტაციების კლინიკური რეკომენდაცია [8520]

სამედიცინო დაწესებულების მართვის ისტორიული ასპექტები [7859]


თემების რაოდენობა: 16
კომენტარები: 3

მარათონთან დაკავშირებული სიკვდილის მიზეზი ტვინის ღეროს ჰერნიაციაა, რაც რეჰიდრატაციასთან ასოცირებული ჰიპონატრემიის შედეგია

ავტორი: ა. პეცოლდი,1 ი. ეფლბაი,1 ჟ. ქირი 2
1ლონდონის ნევროლოგიისა და ნეიროქირურგიის ნაციონალური საავადმყოფოს ინტენსიური თერაპიის განყოფილება; 2ლონდონის ნევროლოგიის ინსტიტუტის ნეიროიმუნოლოგიის დეპარტამენტი.

>>  წინასიტყვაობა: რბოლის დასრულებისას მარათონელთა ნევროლოგიური სტატუსის გაუარესების რისკის განსაზღვრა სიძნელეებთანაა დაკავშირებული. წარმოგიდგენთ ტვინის ღეროს ჰერნიაციის შემთხვევას განპირობებულს რეჰიდრატაციასთან ასოცირებული ჰიპონატრემით.
შემთხვევის აღწერა: ჩვენს მიერ მოყვანილია დაახლოებით 30 წლის მარათონელის სიკვდილის შემთხვევა, რომელმაც რბოლის დასრულებისას დასვენებისთვის განკუთვნილ ადგილზე გონება დაკარგა. გადაუდებელი სამედიცინო დახმარების დეპარტამენტში რეჰიდრატაციის შემდგომ მას სუნთქვის გაჩერება აღენიშნა. სისხლში ნატრიუმის დონე 130 mM-ს (ჰიპონატრემია) შეადგენდა. კტ სკანირებამ მწვავე ჰიდროცეფალია და ტვინის ღეროს ჰერნიაცია აჩვენა. სასწრაფოდ შესრულებული ექსტრავენტრიკულური დრენირების მიუხედავად მარათონელი მომდევნო დღეს გარადაიცვალა. თვალის ფსკერის დათვალიერებით მწვავე-ქრონიკული პაპილედემა დადგინდა. თავზურგტვინის სითხის სპექტროფოტომეტრიით ოქსიჰემოგლობინი ან ბილირუბინი კვალის სახითაც ვერ ინახა, თუმცა ფერიტინის დონე (530 ng/mL ნორმის ზედა ზღვარი 12 ng/mL) მნიშნელოვნად იყო მომატებული, რაც მანამდე არსებული სისხლდენის შედეგია. რეტროსპექტულად დადასტურდა, რომ რბოლამდე რამდენიმე თვით ადრე მარათონელს თავის ძლიერი (მეხისებური) ტკივილი აღენიშნებოდა, რასაც შემდგომში დილის თავის ტკივილები და გულისრევა მოყვა. ყველაფერი ეს კი, მეორადი ჰიდროცეფალიით გართულებულ სუბარაქნოიდულ სისხლჩაქცევაზე მეტყველებს. სწორედ ამით შეიძლება აიხსნას ის ფაქტი, რომ საშუალო ხარისხის რეჰიდრატაციასთან ასოცირებულმა ჰიპონატრემიამ ჰერნიაციისათვის საკმარისი ტვინის შეშუპება გამოიწვია.
დასკვნა: მარათონელთა სისხლში ნატრიუმის დონესა (შრატის Na < 135 mM) და არასპეციფიკურ სიმპტომებზე დაყრდნობით, განვიხილავთ თუ როგორ შეიძლება დაგვეხმაროს ისეთი მარტივი სკრინინგ ტესტი, როგორიცაა ფუნდოსკოპია იმ პირთა გამოსავლენად, რომლებიც სასწრაფოდ საჭიროებენ ნეიროვიზუალიზაციას.


წინასიტყვაობა
მარათონული რბოლის შემდეგ ტვინის ღეროს ჰერნიაციით გამოწვეული დაუყოვნებელი სიკვდილი ძალზედ იშვიათია.1 მისგან განსხვავებით კი მარათონელებში მაღალია რეჰიდრატაციასთან ასოცირებული ჰიპონატრემიის რისკი (დაახლ. 13 %).2 ჰიპონატრემიის კლასიკურ სიმპტომები არასპეციფიურია და მას მიეკუთვნება ლეთარგია, გულისრევა/ღებინება, გაღიზიანებადობა/მოუსვენრობა, დეზორიენტაცია, თავის ტკივილი, კუნთების სისუსტე და მტკივნეული კრუნჩხვები.2,3 მწვავე შემთხვევებში კი შესაძლოა განვითარდეს კონფუზია, ფსიქოზი, კრუნჩხვები, დაქვეითებული რეფლექსები, ფილტვების ნეიროგენული შეშუპება, ცერებრული ინფარქტი და სუნთქვის გაჩერება. ჩვენთვის ცნობილია ჰიპონატრემიული ენცეფალოპათიის შედეგად განპირობებული ტვინის ღეროს ჰერნიაციით მარათონელთა სიკვდილის ორი შემთხვევა, რომლებიც ლიტერატურაში საბოლოოდ დოკუმენტირებული არ არის.1,4 აქ ჩვენ წარმოგიდგენთ იმ შემთხვევის დეტალურ აღწერას, როცა ჰიპონატრემიამ და ტვინის ღეროს ჰერნიაციამ მარათონელის სიკვდილი განაპირობა და ამ ფაქტს გადაუდებელი სამედიცინო დახმარებისათვის დიდაქტიკურ ჭრილში განვიხილავთ.

შემთხვევის აღწერა
გადაუდებელი სამედიცინო დახმარების დეპარტამენტში მოყვანილ იქნა დაახლოებით 30 წლის მამაკაცი, რომელმაც მარათონული რბოლა მზიან, თუმცა ცივ ამინდში 4 საათში დაასრულა და დასვენებისთვის განკუთვნილ ადგილზე გონება დაკარგა. შემოსვლისას პაციენტი უჩიოდა სისუსტეს და თავის ტკივილს. მისი მდგომარეობა გლაზგოს კომის შკალით (გკშ) 15/15 ქულით შეფასდა, გუგების რეაქცია და სხვა ობიექტური მონაცემები ნორმის ფარგლებში გახლდათ. სისხლის წნევა 130/80 mmHg შეადგენდა. ეკგ-მ სინუსური რითმი და გულისცემის სიხშირე 80 აჩვენა. გულმკერდის რენტგენოგრაფიით ფილტვების შეშუპება არ დადგინდა. სისხლში შაქრის დონე 5,4 mM, Na-ისა კი 133 mM იყო. ვინაიდან მასთან ერთად დეპარტამენტს დასახმარებლად ანალოგიური სიმპტომების მქონე ასამდე სპორტსმენმა მომართა, ჩაითვალა, რომ მარათონელის ჩივილების მიზეზი დაჰიდრატაცია იყო და მას რეჰიდრატაციული თერაპია ჩაუტარდა (1 ლ 5%-იანი დექსტროზა და 1 ლ 0,9%-იანი NaCl). გონების დაკარგვიდან 4 საათის შემდეგ პაციენტს დაეწყო ღებინება და გკშ 11/15-მდე დაეცა. ცოტა ხანში კი ამას სუნთქვის გაჩერებაც მოყვა, რის გამოც მარათონელს ტრაქეის ინტუბაცია ჩაუტარდა. გადაუდებელმა კტ სკანირებამ მწვავე ჰიდროცეფალია და შუა ტვინის დიდ ხვრელში ჩაჭედვა აჩვენა (სურ. 1E და1F). სისხლში Na-ის დონე 130მმოლს, სავარაუდოდ რეჰიდრატაციის გამო, შეადგენდა. შრატის ოსმოლარობა 279მოსმოლ/კგ, ხოლო შარდის 126 მოსმოლ/კგ იყო. შრატის შარდოვანა ნორმის ფარგლებში – 5.0 მმოლი გახლდათ. სავარაუდოდ სირბილის დროს კუნთების გაძლიერებული მუშაობის გამო შრატში კრეატინკინაზას დონე მომატებული – 948სე/ლ იყო. პაციენტი გადაგზავნილ იქნა ახლომდებარე ნეიროქირურგიულ ცენტრში, სადაც მას სასწრაფო წესით ექსტრემალურად მაღალი ქალასშიდა წნევის პირობებში ექსტრავენტრიკულური დრენირება ჩაუტარდა. ინტრაკრანიული წნევა არ განსაზღვრულა, თუმცა თავზურგტვინის სითხე მაღალი წნევით მოედინებოდა. გონების დაკარგვიდან 8 საათში მარათონელი უკვე ინტენსიური თერაპიის განყოფილებაში იყო, გუგები ურეაქციო და დილატირებული გახლდათ, ფუნდოსკოპიამ მხედველობის დისკოს შეშუპება აჩვენა.5 გუგები ურეაქციო რჩებოდა, გკშ 3/15-მდე დაეცა. სედაციის მოხსნიდან 8 საათში ტვინის ღეროს სიკვდილი დადასტურდა. გვამის გაკვეთა არ ჩატარებულა.
ოპერაციის დროს აღებული თავზურგტვინის სითხე კტ ნეგატიური სუბარაქნოიდული სისხლჩაქცევის გამოსარიცხად სპექტროფოტომეტრულ კვლევაზე გაიგზავნა. ოქსიჰემოგლობინი და ბილირუბინი კვალის სახითაც ვერ ინახა,6 თუმცა მნიშნელოვნად იყო მომატებული ფერიტინის დონე (530ნგ/მლ, ნორმის ზედა ზღვარი 12ნგ/მლ), რაც მანამდე არსებული სისხლდენის შედეგია. ყველაფერი ეს კი იმაზე მეტყველებს, რომ რბოლამდე მარათონელს სუბარაქნოიდული სისხლჩაქცევა და მეორადი ჰიდროცეფალია აღენიშნა. პაციენტის მეუღლის გამოკითხვით დადგინდა, რომ მარათონამდე 3 თვით ადრე პაციენტს განუვითარდა ძლიერი თავის ტკივილი, რომლის ინტენსივობამაც იმატა, შემდგომში კი ავადმყოფს დაძინების საშუალებასაც არ აძლევდა. მას გულისრევა/ღებინებაც აწუხებდა და კისრის ტკივილის გამო ვერც თავს ატრიალებდა. დასახმარებლად მოსულმა ექიმმა ნახა, რომ პაციენტს მაღალი წნევა ჰქონდა და წნევის დამწევ საშუალებასთან ერთად მას კისრის ტკივილის მოსახსნელად პარაცეტამოლიც მისცა. მომდევნო კვირებში თავის ტკივილების ინტენსივობა ხან იმატებდა, ხანაც მცირდებოდა. პაციენტს დაეწყო უმადობა, დილაობით გულისრევა. ამ ყველაფრის მიუხედავად მაინც აგრძელებდა ვარჯიშს და მზადებას მარათონისთვის. პირველად განვითარებული თავის ტკივილიდან ორი თვის შემდეგ, როდესაც 35,4კმ გაირბინა, მან კიდევ ერთხელ იგრძნო სავარაუდოდ უკვე დეჰიდრატაციასთან ასოცირებული ძლიერი თავის ტკივილი, რომლის კუპირებაც ორალური რეჰიდრატაციით ვერ მოხერხდა. ამ დღიდან ერთი თვის შემდეგ კი მან დაფარა მთელი დისტანცია და დასვენებისთვის განკუთვნილ ადგილზე გონებაც დაკარგა. საბოლოოდ კი იგი, რეჰიდრატაციასთან ასოცირებული ჰიპონატრემიის გამო, მანმადე არსებული სუბარაქნოიდული სისხლჩაქცევისა და მეორადად განვითარებული ჰიდროცეფალიის ფონზე, ტვინის შეშუპებისა და ტვინის ღეროს ჰერნიაციით ინტენსიური თერაპიის განყოფილებაში გარდაიცვალა.

შემთხვევის განხილვა
აღნიშნული ტრაგიკული შემთხვევა იმ რამდენიმე პრობლემას (ჰიპონატრემია, თავის ტკივილი, გულისრევა) მოიცავს, რასაც შეიძლება გადაუდებელი სამედიცინო დახმარების დეპარტამენტში შევხვდეთ.
ჰიპონატრემია
ათლეტთა დაახლოებით 13%-ს რეჰიდრატაციასთან ასოცირებული ჰიპონატრემია უვითარდება,2 რაც მას პოტენციურად რთულ ლოჯისტიკურ ამოცანად აქცევს (მსოფლიო მასშტაბით ათეულობით ათასი სპორტსმენი მაღალი დონის მარათონებში იღებს მონაწილეობას). მწვავე ჰიპონატრემიის დროს სიმპტომთა განვითარება არა ნატრიუმის აბსოლუტურ რაოდენობაზე, არამედ მისი დონის შემცირების სისწრაფეზეა დამოკიდებული.3 სისხლსა და ტვინის პარენქიმას შორის არსებულმა ოსმოსურმა გრადიენტმა შესაძლოა ტვინის ლეტალური შეშუპება გამოიწვიოს, რაც თავის მხრივ ინტრაკრანიული წნევის გაზრდას, ტვინის ღეროს ჰერნიაციას, სუნთქვის ცენტრის დეპრესიას და სიკვდილს განაპირობებს.3,4,8-10 სისხლში გლუკოზის ნორმალური კონცენტრაციისას, 5%-იანი დექსტროზის ინფუზია რეკომენდებული არ არის (როგორც ჩვენს შემთხვევაში მოხდა), რადგან ამ დროს ჰიპონატრემიის ფონზე ტვინის შეშუპების ხარისხი იზრდება. ლიტერატურაში არსებული სხვა მსგავს პაციენტებთან შედარებით ჩვენს პაციენტს საშუალო სიმძიმის ჰიპონატრემია აღენიშნებოდა (ცხრილი 1). მიუხედავად ამისა, მათ შორის განსხვავება მაინც დიდია. გარიგანისა და მისი თანამშრომლების, ასევე ო’ბრიენისა და კოლეგების მიერ მოხსენებული პაციენტი გადაუდებელი სამედიცინო დახმარების დეპარტამენტში ჭარბად სითხის მიღების გამო (9,46 ლიტრი სასმელი წყალი 90 წუთის განმავლობაში) ფილტვების წითელი შეშუპებით მოხვდა.9 ჩვენმა პაციენტმა კი მხოლოდ 3 ლიტრი იზოტონური ხსნარი 4 საათის განმავლობაში მიიღო. მართალია უცნობია თუ რა ოდენობის წყალი დალია მარათონელმა რბოლის დასრულებისას, მაგრამ შემოსვლისას ნორმალური ჰემატოკრიტი – 0,373 და გულმკერდის ნორმალური რენტგენოგრამა იმაზე მეტყველებს, რომ იგი სითხით გადატვირთული არ გახლდათ. მარათონელის სიკვდილის სხვა შემთხვევა კი, რომელიც აიუსისა და მისი კოლეგების მიერაა4 აღწერილი, ცუდი მენეჯმენტის შედეგია, რომელიც პაციენტის მკურნალობას სითხის შეზღუდვით გულისხმობს. აღნიშნული სტრატეგია სარწმუნო მონაცემებს მოკლებულია.

ამ ყველაფრიდან გამომდინარე, ვეჭვობთ, რომ ჩვენ პაციენტს რბოლამდე სუბარაქნოიდული სისხლდენა და მეორადი ჰიდროცეფალია ჰქონდა. ამიტომაც, ტვინის მსუბუქი ხარისხის შეშუპებამ ტვინის ღეროს ჰერნიაცია განაპირობა. ჰიპონატრემიულ ენცეფალოპათიას ავტორთა საპატივცემულოდ ვარონ-აიუსის სინდრომი ეწოდა (Varon-Ayus syndrome).11
თავის ტკივილი
თავის ნებისმიერი ახლად განვითარებული მწვავე ტკივილი საეჭვოა. სუბარაქნოიდულ სისხლდენაზე უნდა ვიფიქროთ მაშინ, როცა თავის ტკივილი უეცრად იწყება და მას თან ღებინება, მენინგიზმი (კისრის კუნთების რიგიდობა) და მაღალი არტერიული წნევა ახლავს. შემთხვევათა 50%-ში პაციენტები განიცდიან ძლიერ, მეხისებურ თავის ტკივილს. მენინგიზმი კარგი კლინიკური, მაგარამ არასენსიტიური ნიშანია, რადგან მის განვითარებას რამდენიმე საათი ჭირდება.13 არტერიული წნევის მატება კომპენსატორული ფენომენია, რათა შენარჩუნებულ იქნას თავის ტვინის პერფუზიული წნევა. თუკი სუბარაქნოიდული სისხლჩაქცევა კტ ნეგატიურია, რეკომენდებულია თავზურგტვინის სითხის სპექტროფოტომეტრული კვლევა.6,14 ცერებროსპინალურ სითხეში ბილირუბინის დონე სისხლჩაქცევიდან 6-12 საათში იმატებს და სისხლჩაქცევიდან 2 კვირის განმავლობაში იგი ძალზედ სენსიტიური (100%) მარკერია. სენსიტიურობა 3 კვირის შემდეგ 91%-მდე და 4 კვირის შემდეგ 71%-მდე მცირდება.15 აღნიშნულ შემთხვევაში თავზურგტვინის სითხეში ფერიტინის დონის განსაზღვრას დიაგნოსტიკური ღირებულება ჰქონდა.7,14 სუბარაქნოიდული სისხლჩაქცევის შემდგომ თავის ტვინის პარკუჭთა დილატაცია პაციენტთა 25%-შია ნანახი. ზოგიერთ შემთხვევაში პარკუჭთა გარეთა დრენირება ამ დაზიანების აღმოსაფხვრელად საკმარისია, ზოგჯერ კი მუდმივი შუნტის დაყენებაა საჭირო.13
გულისრევა
თუკი გულისრევა (დილის გულისრევა) თავის ტკივილთან, უმადობასა და მხედველობის დისკოს ქრონიკულ შეშუპებასთანაა ასოცირებული ეჭვი უნდა მივიტანოთ ინტრაკრანიული წნევის მატებაზე. განარჩევენ მხედველობის დისკოს შეშუპების 4 სტადიას: ადრეული, განვითარებული, ქრონიკული და ატროფიული.5 ადრეული სტადია 3-4 საათში ვითარდება და ინტრაკრანიული წნევის დრამატულმა, მწვავე მატებამ შესაძლოა ბადურა გარსის ნერვული ბოჭკოების შრეში (ნბშ) სისხლჩაქცევებიც გამოიწვიოს.17 (იხ სურ. 2A).
ოპტიკური დისკოს შეშუპების სარწმუნო კლინიკურ ნიშანს ნბშ-ს შეშუპება, ბადურაზე პერიპაპილარულად სისხლჩაქცევები და ნბშ-ს პერიპაპილარული შემღვრევა წარმოადგენს (სურ. 2B). ნბშ-ს შეშუპება აგრეთვე იწვევს სისხლძარღვთა ტიპიურ სურათის განვითარებას (სურ. 2C-D). ოპტიკური დისკოს შეშუპებისას ბადურის ვასკულატურა შესაძლოა სრულიად შეინიღბოს (სურ. 2E). თუკი შეშუპება ხანგრძლივი დროის განმავლობაში რჩება, აქსონთა დეგენერაციის გამო დისკოს შეშუპება თანდათან უკუგანვითარდება (სურ. 2F). ბადურის ცენტრალურ ვენაში წნევის ქრონიკული მატების გამო რეტინოქოროიდული ვენური კოლატერალები ვითარდება (სურ. 2F).17
ინდივიდუალური განსხვავების გამო, ბადურის ჰიპერემია და მხედველობის დისკოს კიდეების შემღვრევა ნაკლებად სარწმუნო კლინიკური ნიშანია. ჩვეულებრივ ოპტიკური დისკოს მწვავე ედემა აღმოცენდება ბილატერალურად და ასოცირებულია მხედველობის ნორმალურ მაჩვენებლებთან (სიმახვილე, ველი, ფერადი მხედველობა).17
სპონტანური ვენური პულსაციის არარსებობა ინტრაკრნიული ჰიპერტენზიის არასარწმუნო ნიშანია, რადგან იგი ნორმალური ინდივიდების 80%-შია ნანახი.18
ცერებროსპინური სითხის (ცსს) ანალიზი
ჩვენს მიერ აღწერილ შემთხვევაში ცსს ანალიზმა მნიშვნელოვანი დიაგნოსტიკური როლი შეასრულა. თავდაპირველად, სპექტროფოტომეტრიამ ჰემოგლობინი, ოქსიჰემოგლობინი ან ბილირუბინი კვალის სახითაც ვერ აღმოაჩინა, რამაც თავის მხრივ ახალი სისხლდენა გამორიცხა.14 ცსს-ში პროტეინი ნორმის ფარგლებში გახლდათ (0,55 გ/ლ. ნორმა 0,15-0,64 გ/ლ), რაც იმაზე მეტყველებდა, რომ სისხლი-ცსს ბარიერი მნიშვნელოვნად დარღვეული არ იყო, თუმცა ამ ბარიერის მცირე ხარისხით დაზიანება არ გამორიცხულა და ამ მიზეზით როგორც ცსს-ის, ისე შრატის პროტეინის დონე განისაზღვრა. ვინაიდან ამ კონკრეტულ შემთხვევაში, ანალიზზე ექტრავენტრიკულური დრენაჟიდან მიღებული ცსს გაიგზავნა, გამოსაკვლევი ნიმუშის შესაძლო კონტამინაცია ალბუმინით არ გამოირიცხა (ცსს ერითროციტები 2*103, ლეიკოციტები არ აღმოჩნდა) და ამიტომ ცსს:შრატის ალბუმინის თანაფარდობა, როგორც სისხლი-ცსს ბარიერის მთლიანობის მაჩვენებელი ჩვენს მიერ არ განსაზღვრულა. ცსს ლაქტატის მაღალი დონე (12,7 მმოლი, შრატში მისი ნორმა 1,3 მმოლი) ცსს ტოტალური პროტეინისა და გლუკოზის ნორმალურ მაჩვენებელთან (ცსს-ში 2,1 მმოლი, შრატში 7,9 მმოლი) ერთად თავის ტვინის მომატებულ ანაერობულ მეტაბოლიზმზე მეტყველებდა, რაც სავარაუდოდ მაღალი ინტრაკრანიული წნევისა და ცნს-ის დაქვეითებული პერფუზიის შედეგი იყო.

ჩვენს მიერ წარმოდგენილ შემთხვევაში დიაგნოსტიკური გასაღები ნორმასთან შედარებით 44-ჯერ მომატებული ცსს ფერიტინის დონეა (530 ნგ/მლ). ცსს ფერიტინი მეტისმეტად დიდი ზომისაა სისხლი-ცსს ბარიერის გავლისთვის (450-480 კდალტონი), ამგვარად იგი ინტრათეკალურად გახლავთ პროდუცირებული.7,19 ცსს ფერიტინის დონის პირველადი ზრდა ასოცირებულია ინტრაცერებრული სისხლდენის ნებისმიერ ფორმასთან, რომელსაც თან ახლავს ზედაპირული სიდეროზი. ფერიტინი იმატებს ცნს ნეკროზის, ვასკულიტების, ინფექციებისა და ცნს-ის სხვადასხვა სახის ინფექციის დროსაც.14 ორმა ერთმანეთისაგან დამოუკიდებლად ჩატარებულმა კვლევამ სუბარაქნოიდული სისხლდენიდან სამი დღის განმავლობაში ცსს ფერიტინის დონის მკვეთრი ზრდა აჩვენა.20,21 სუზუკისა და მისი თანამკვლევარების მიერ ინახა, რომ სისხლჩაქცევიდან 3-4 დღეში ცსს ფერიტინის დონე პაციენტებში მეორადი ჰიდროცეფალიით დაახლოებით 1000 ნგ/მლ ფარგლებში მერყეობს, ხოლო იმ პირებში, რომელთაც ჰიდროცეფალია არ აღენიშნებათ ეს მაჩვენებელი საშუალოდ 250 ნგ/მლ შეადგენს.20 ჩვენს მიერ 24 პაციენტზე დაკვირვებამ კი პარკუჭოვანი ცსს ფერიტინის 65 ნგ/მლ-დან მეთერთმეტე დღეს 1750 ნგ/მლ-მდე ზრდა აჩვენა.21 ჯერჯერობით მსოფლიო სამედიცინო ლიტერატურაში არ მოიპოვება მონაცემები იმის შესახებ თუ რა დონეს აღწევს ცსს ფერიტინი ინტრაკრანიალური სისხლდენიდან თვეებისა თუ წლების შემდეგ. ალბათ მისი დონე ნელ-ნელა დაიწევს და ნორმას დაუბრუნდება.
ამგვარად, ცსს-ის ანალიზი (ციტოლოგია, ტოტალური პროტეინი, გლუკოზა, ლაქტატი, ცსს სპექტროფოტომეტრია, ცსს ფერიტინი) მნიშვნელოვანი დიაგნოსტიკური გასაღებია იმ შემთხვევებისა, როდესაც გადაუდებელი სამედიცინო დახმარების დეპარტამენტში მოთავსებულია პაციენტი ცნს-ის დაავადებით და, რომელსაც ისეთი არასპეციფიური სიმპტომები აღენიშნება, როგორიც თავის ტკივილი და გულის რევაა.

დასკვნა
გადაუდებელ სამედიცინო დახმარების დეპარტამენტში მოთავსებულ იმ ათლეტთა იდენტიფიკაციისათვის, რომლებიც სასწრაფო ნეიროვიზუალიზაციას საჭიროებენ თვალის ფსკერის გამოკვლევა მნიშვნელოვანი კლინიკური ტესტია. ფუნდოსკოპიის მონაცემებზე, კლინიკური ნიშნებსა და სიმპტომებზე დაყრდნობით აღნიშნულ შემთხვევაში შესაძლოა სუბარაქნოიდული სისხლჩაქცევა და ინტრაკრანიული ჰიპერტენზია გვევარაუდა.

ინგლისურიდან თარგმნა გ. მაშანეიშვილმა

ლიტერატურა

ნანახია: 6040 | შეფასებულია: 2 | რეიტინგი: [5.00]  



შეფასება

შესაფასებლად გაიარეთ ავტორიზაცია, ან დარეგისტრირდით


კომენტარები

კომენტარის დასამატებლად გაიარეთ ავტორიზაცია, ან დარეგისტრირდით



სახელი

პაროლი


2010 | მაისი–ივნისი | 16

2010 | მარტი–აპრილი | 15

2010 | იანვარი–თებერვალი | 14

2009 | ნოემბერი–დეკემბერი | 13

2009 | სექტემბერი–ოქტომბერი | 12

2009 | ივლისი–აგვისტო | 11

2009 | მაისი–ივნისი | 10

2009 | მარტი–აპრილი | 9

2009 | იანვარი–თებერვალი | 8

2008 | ნოემბერი–დეკემბერი | 7

2008 | სექტემბერი–ოქტომბერი | 6

2008 | ივლისი–აგვისტო | 5

2008 | მაისი–ივნისი | 4

2008 | მარტი–აპრილი | 3

2008 | იანვარი–თებერვალი | 2

2007 | ნოემბერი–დეკემბერი | 1


ჯანდაცვის მსოფლიო ორგანიზაცია

საქართველოს შრომის, ჯანმრთელობის და სოციალური დაცვის სამინისტრო

თბილისის სახელმწიფო სამედიცინო უნივერსიტეტი

ქართული google


დარეგისტრირებულია: 531

ამჟამად საიტზეა: 9

თქვენ ხართ სტუმარი No: 1286561


საიტის ავტორი: კობა კურტანიძე
© Copyright 2009-2017 MODERNPUBLISHING.GE
საიტზე არსებული მასალის გამოყენება ან გავრცელება, საიტის ადმინისტრაციის ნებართვის გარეშე, აკრძალულია.